og það stytti upp ...

þó ekki nema í einn dag, það var bara sól hér í Ási í gær, merkilegt. Þó stóðst reglan um reglufasta veðurfarið ekki, nei það var komið drungalegt veður aftur í dag. Í tilefni þess skrapp ég með Hauki á landbúnaðarsýninguna Agroteknikk í gær. Er sú sýning öll mikið minni að umfangi en t.d. Agromek sýningin. Allavega var sýningarsvæðið minna, þó svo að það hafi verið býsna stórt. Mestmegnis voru vélar til sýnis þarna en eitthvað var þó um önnur landbúnaðartæki. Steig uppí nýjustu gerðina af JCB dráttarvél og já ... hún líkist eiginlega meira geimskipi að innan en dráttarvél. Held allavega að ég myndi ekki vinna mikið á henni, er það ekki einum of þegar menn eru komnir með tölvuskjá til að sýna hvað sé fyrir framan dráttarvélina. Hugsa að ég myndi frekar notast við nýjustu gerð af Zetor sem var þarna til sýnis, þó hún hafi verið frekar frumleg miðað við hina en samt brúkleg til flestra dráttarvélarverka. Haukur hafði þó á orði að hann myndi sennilega segja upp vinnu ef hann þyrfti að vinna á slíkri vél. Zetor má þó eiga það að þeir hafa ekki minnkað stýrishúsið á vélum sínum, það er enn jafnstórt.

Álit mitt á norska kerfinu hefur ekki aukist síðan í síðustu viku, hvað er fólk að kalla yfir sig heima á Íslandi með þessari ríkisstjórn, sem skýlir sér bak við norræna velferð, mér er spurn. Fór með Ragnari á föstudaginn að endurheimta tölvuna hans úr viðgerð hjá Apple umboðinu. Þið lásuð rétt, Apple tölva bilað, svo margir sem dásama það merki, jafnvel ég. En það var líkt og áður með þessa Norðmenn að þeir gefa misvísandi skilaboð svo þetta var fýluferð og tölvan ekki enn komin úr viðgerð, sjálfsagt hafa þeir sent hana til Tromsö í staðinn fyrir Ski, segi nú bara svona.

Síðan á landbúnaðarsýningunni í gær, þá lögðum við á bílastæði sem menn leiðbeindu okkur á með því að baða höndunum út í allra áttir. Ekki tókum við eftir svona hvítum kassa þar sem hægt var að fá bílastæðamiða í ákveðinn tíma. Hef Norðmenn grunaða um fela þá viljandi. Nema þegar við komum út af sýningunni þá er svona fallegur gulur mið á rúðunni sem tjáði okkur að bílnum væri lagt ólöglega og þyrfti að greiða sekt. Og hvað haldið þíð nú að svona sekt sé há í Noregi. 570 NOK eða rúmlega 13.000 kall m.v gengi dagsins. Veit svosem ekki hvað svona sektir eru háar á Íslandi í dag en ég hef einu sinni fengið stöðumælasekt og hún var uppá 500 kall, sem er smáaur í samanburði við þetta.

En svona fara Norðmenn að, taka gjald fyrir allt og það ríflegt. Hef mikið velt fyrir mér bréfi sem ég fékk frá bankanum í vikunni en ég var semsagt að millifæra húsaleigu um daginn og hakaði við Kvitteringsoblat í heimabankanum í þeirri trú að þeir myndu senda leigusalanum kvittun. Svo er víst ekki, ég fékk senda kvittun til mín sem er prentuð á svona A4 límmiðaörk og nokkrir minni límmiðar á henni líka með greiðsluupplýsingum sem ég hef bara ekki grænan grun um hvað ég eigi að gera við. Spurning um að fara föndra eitthvað, t.d. jólaskraut með svona bankalímmiðum, hver veit .........................

og það rignir ...

og rignir og rignir og rignir og rignir og rignir meira og svo er jafnvel komið svartamyrkur á þessum tíma dags. Allt öðruvísi hér í útlandinu, held ég kunni betur við kuldann á Íslandi á þessum árstíma eða hitann á Nýja-Sjálandi þegar ég var þar fyrir 2 árum, allavega er þetta veðurfar mun leiðinlegra en ég á að venjast. Vonandi skánar það eftir jól þegar kemur meiri snjór og verður kaldara, vona að það líkist meira íslensku veðurfari en þessi rigning alltaf hreint. Ég vil hafa snjókomu í nóvember, frekar en rigningu.

Talandi um myrkrið, sem verður enn meira þegar jörðin er svona auð og drungalegt yfir að líta. Þá held ég að Norðmenn tími varla að splæsa pening í almennilega götulýsingu. Íslendingar eru þar mun framar, það eru ekki einu sinni stikur á þjóðvegi hér, þannig að ef maður mætir elg út í skógi (t.d. á leiðinni Ås-Ski), þá bara óheppinn þú. Jákvæði hluturinn við þetta er þó sá að norðmenn lýsa götur sínar meira upp en Svíar, sem segir allt sem segja þarf um ESB. En þetta er kannski lykillinn að norrænni velferð að spara peningana sem mest og byggja upp mikla sjóði. Sjáum til hvernig til tekst að skapa norrænt velferðarkerfi á Íslandi, af fréttum að dæma eru nokkrar ágætar hugmyndir en ég held að fleiri séu vanhugsaðar og muni draga mikið úr velferð á Íslandi.

Svo maður haldi nú áfram að finna aðeins að Norðmönnum, þá finnst mér þeir nota íþróttablys full til mikið. Á leið minni í skólann sem er ágætis labbitúr ca. 3 km aðra leið, mæti ég slatta af fólki. Mér finnst nánast annar hvor maður vera púandi íþróttablys í leit að innri frið með ávandbindandi ógeði. Þið fyrirgefið en reykingarmenn eiga enga samúð hjá mér þegar ég þarf að anda óbeint að mér reyk í tíma og ótíma. Mér finnst þetta ekki vera svona mikið á klakanum, en kannski er ég bara svona mikill sveitamaður að ég tek ekki eftir þessu þar, fatta þetta þegar ég þarf loksins að búa í meðalstóru sveitaþorpi í Noregi ..... þetta hlýtur bara að kosta norska ríkið mikla peninga í heilbrigðiskerfinu ár hvert.

En svo við tökum upp léttara hjal, þá gengur lífið bara sinn vanagang, námsbækurnar eru minnst spennandi efnið dag hvern eins og það hefur verið til þessa í skólagöngu minni. Held það sé alltaf svoleiðis. Þarf að fara byrja á því að skrifa námsverkefnið í útreikningaáfanganum, á að vera eitthvað um 10 bls á engilsaxneskri tungu, sem ég er afskaplega lélegur að skrifa. Held ég sé kominn til ráðs við lausnarmengi útreikninganna þar sem ég er búinn að flækja þessa einföldu jöfnu hér y = Xb + Zu + e í y = Xb + Za + Zm + Zc + e þar sem ég tek genaáhrif mæðra og sameiginlegs umhverfis mæðra með. Voða gaman allt saman, sérstaklega þegar maður skilur svona flókna hluti eins og þennan hér:

C=       inv([X'*X X'*Z1 X'*Z2 X'*Z3;

            Z1'*X Z1'*Z1+Ai*k(1,1) Z1'*Z2+Ai*k(1,2) Z1'*Z3;

            Z2'*X Z2'*Z1+Ai*k(1,2) Z2'*Z2+Ai*k(2,2) Z2'*Z3;

            Z3'*X Z3'*Z1 Z3'*Z2 Z3'*Z3+eye(336)*k(3,3)])

Gagnasafnið sem ég vinn með snýr að fallþunga Ásgarðsdilkanna í haust og er niðurstaðan úr þessu dæmi voða margar tölur (3309 ef ég man rétt). Get þó upplýst það að Skugga-Sveinn Gránason er bestur út frá þessari niðurstöðu með alveg 154 í BLUP einkunn (þegar búið er að staðla matið) sem ég held að verði að teljast býsna gott. Eitthvað hefur hann fundið á sér nafni hans, guðfaðirinn úr Hornafirði sem taldi mér trú um að láta hann lifa haustið 2007. Sé ekki eftir því. Best að halda áfram að skrifa........

Hvað má

ganga langt í því að notfæra sér ófarir annarra til að markaðsetja vöru?

Spyr sá sem ekki veit .............

Í lífsins ólgu sjó (vatni)

Snemma í haust ákvað íslenski karlahópurinn hér í Ási að fara í veiðiferð. Ákveðið var að fara til Svíþjóðar og veiða í Vättern í Svíþjóð (sjá hér), en þetta er mjög gott veiðivatn, þar sem veiðivon er mikil og sænska ríkið leggur mikla fjármuni í að ala fisk þarna til að byggja upp ferðamannaiðnað. Lagt var af stað á fimmtudaginn og haldið áleiðis til Karlsborgar þaðan sem lagt var upp í veiðitúrinn en gist var á vandræðaheimilinu í Karlsborg (Karlsborgs Vandrarhem).

Fyrsti áfangastaður var Strömstad þar sem áð var til að kaupa mat og aðra þarfa hluti sem þarf í svona ferð s.s. bjór. En þar má finna mikið úrval og voru keyptar nokkrar tegundir til að prufa. Héldum við svo áfram leið okkar skv. GPS tækinu hans Hauks, reyndist það okkur vel og skilaði okkur á áfangastað, gleymdist samt einu sinni að fylgjast með því og lentum við þá af leið en þá var umræðuefnið í bílnum pólitík og Framsóknarflokkurinn. Ekki í fyrsta skipti sem Framsóknarflokkurinn beinir fólki af leið.

Á vandræðaheimilinu lentum við rétt uppúr 23:00 og var þá ákveðið að taka aðeins í spil, eina spilið sem fannst á staðnum var sænskt Trivial og spiluðum við það til klukkan eitt um nóttina, var árangurinn misjafn þar sem skilningur á spurningum gekk misvel og reglurnar því nokkuð eftir því ... meir að segja barnaspurningar reyndust okkur erfiðar.

Í gærmorgun var síðan ræs klukkan 7:00 og byrjað á því að fá sé morgunmat, sem samanstóð af eggjum og beikoni. Kannski ekki alveg besti morgunmatur í heimi sem kom betur í ljós er leið á daginn. Einnig smurðum við lifandis býsn af nesti enda langur dagur fyrir höndum. Það var því brattur mannskapur sem fór um borð og hélt til veiða á Vättern. Sá brattleiki hvarf þó fljótt af mér þar sem ölduhæð var þó nokkur á vatninu og vatnaveiki (sjóveiki) tók að hrjá mig. Morgunmaturinn átti aðalþátt í því held ég (egg og beikon fara ekkert vel í maga, samanber þessa tveggja ára gömlu færslu mína), jafnvel bjórinn sem var drukkinn með Trivial kvöldið áður og stuttur svefn.

Þrátt fyrir að ég fengi mér sjóveikislyf lynti ólgunni ekkert og voru félagar mínir á tímabili farnir að efast um að ég hefði það yfirhöfuð af og ræddu því um hvernig hægt væri að nota mig í beitu. (Góðir félagar það !) Þannig að ég húkti þarna inní káetu stærri hluta ferðar og vissi lítið hvað fór fram úti á dekki, varð ósköp lítið var við það þegar sást til sólar, þaðan af síður veit ég hver aflinn var, verðið að spyrja ferðafélagana um það. J

Það var því ósköp gott að komast í land klukkan hálffimm og halda af stað aftur áleiðis til Noregs með stoppi í Biltema í Uddevalla og á veitingastað sem nú má bara lesa um í sögubókum á Íslandi. Um margt var rætt á heimleiðinni, m.a. hvað Evrópusambandið er gallað, sérstaklega þar sem veglýsing á E6 í Svíþjóð var mjög slæm, betri í Noregi, þó eru hún ekki góð þar. Svo maður hamri einu sinni enn þá því, þá vona ég að ESB umsókn Íslands fari brátt að snúast í höndum á íslensku stjórnvöldum, höfum ekkert í þennan spillta veiðiklúbb að gera.

En best að fara koma sér að verki, er enn hálf lurkum laminn eftir ferðina, en hafið það gott þar til næst ........................ myndir koma KANNSKI inn síðar

Does EUROP taste well?

Frá Noregsríki er allt bærilegt að frétta. Hef ekki lent í neinum stórkostlegum uppákomum uppá síðkastið nema ef vera skyldi bréfsendingar NAV (norsku heilsugæslunnar) til mín. Þannig var, að eftir allt þetta lykilorðadót sem ég lýsti í þar síðasta pistli komst ég inná mína síðu hjá norsku heilsugæslunni. 21. október fæ ég síðan bréf frá þeim að ég sé ekki með heimilislækni sem ég og vissi, enda skráði ég mig þarna inn til að velja lækni. 22. október fæ aftur sent nákvæmlega eins bréf frá NAV en það sem meira er fékk einnig annað bréf frá þeim sama daginn um að ég væri kominn með fastlækni sem býr hér í Ási. Ekki veit hvers vegna þeir sendu mér tvisvar sinnum sama bréfið.

Svosem ekkert slæmt að fá póst, það sem maður vill ekki nota virkar sem ágætis íkveikiefni þegar kynda þarf kofann, heldur kalt hérna stundum. Þegar ég vaknaði einn morguninn sýndi hitamælirinn hér inní herberginu 10°C og það var fjandi kalt að fara framúr, stendur núna í 16°C, held samt að það sé heldur hlýrra hér, allavega er ég ekki skjálfandi.

Er þessa stundina að vinna í verkefni um frjósemisþætti á músum, afskaplega lítið spennandi að lesa sér til um það en maður ræður víst ekki öllu því sem maður þarf að læra. Þarf einnig að vinna að öðru verkefni en get það ekki sökum þess að tölvuforritið sem til þess þarf fór í mótmælaverkfall og á ég ekki von á að tölvumenn skólans kippi því í lagi fyrr en í fyrsta lagi á morgun, jafnvel ekki fyrr en á þriðjudag/miðvikudag. Hér er hlutunum ekki reddað 1, 2 og bingó. Varð aðeins pirraður yfir þessu þar sem ég þarf að halda kynningu á verkefninu á þriðjudag, en ég tala þá bara um eitthvað annað en þær niðurstöður sem ég ætlaði að reikna.

Síðan held ég að fólk sé ekki með öllum mjalla út af nokkrum útigöngukindum á Íslandi. Þetta er ekki vitund villifé í mínum augum, heldur afkomendur vestfirskra eftirlegukinda sem hafa tímgast þarna í nokkur ár. Kindanna vegna er betra að fella þær heldur en láta horn þeirra vaxa óáreytt í kjálka þeirra eða beinbrot gróa vitlaust saman þegar þær renna til í skriðunum, finnst umræðan jafnast á við að nokkrum fatlafólum eins og Megas lýst svo vel væri sleppt óáreittum í miðbæ Reykjavíkur. Hvað yrði það látið viðgangast lengi?

En fyrir þá sem enn eru að velta fyrirsögninni fyrir sér þá barst kynbótaskipulagið á Íslandi í tal við Tormod um daginn þegar hann var að hjálpa mér með gagnasafnið í HFA301. Ég sagði sem svo að kynbætur hefðu undangengin ár snúist sem mest um að bæta gerðina í sláturlömbum og hann spurði mig á móti þessara gullnu setningar, ég gat lítið sagt. En vissulega er það rétt sem hann sagði að rétt fitusamsetning í kjöti væri það sem mestu máli skipti uppá bragðgæði en ekki sem mestir vöðvar, þó þetta haldist í hendur.

Síðan má náttúrlega snúa setningunni uppá þjóðfélagsumræðuna og þá er mitt svar NEI eða með smá breytingu uppá vestfirsku útilegukindurnar, hugsa að þær muni bragðast ágætlega, allavega er það reynsla mín til þess af íslensku ær og hrútaketi.

En þar til næst, hafið það gott .........................................

Gúmmímjólk

Í Svíþjóðarferð minni í síðustu viku sagði Ragnar við mig: „Þú verður að prufa þetta" og benti á Långfil fernu í mjólkurkælinum. Ég spurði hvað þetta væri og hann sagðist ekki geta lýst því, ég yrði bara að prufa þetta sem ég og gerði.

Daginn eftir prufaði ég réttinn og opnaði fernuna og byrjaði að hella á disk en ekkert gerðist, ekki fyrr en fernan var komin á hvolf og ég kreisti fernuna þá kom smá slurkur úr fernunni og rann mjög hægt niður, hálfpartinn eins og mjög þykkt síróp eða ég veit ekki hvaða vöru ég að bera saman við þetta. Síðan bragðaðist þetta ágætlega nema áferðin var mjög spes, hálfpartinn eins og loftkennt jógúrt og þetta hélst alveg í skeiðinni þó maður snéri henni á hvolf. Mjög spes allt saman eins og Ragnar sagði.

Skv. upplýsingum Arla er Långfil eins konar hleypt mjólk sem þarf sérstaka sýringu og langan þroska. Hún hefur vægt sýrustig og örlítið beiskt bragð og áferðin er sterk og samhangandi - löng. Seigfljótandi áferð.

Fann þetta myndband fyrir þá sem vilja sjá Långfil á mynd.

Norræn velferð ...

... veit ekki alveg útá hvað hún gengur, en hluti af henni hlýtur að vera eftirlits/skráningarkerfið í hverju landi fyrir sig. Reynsla mín af því að flytja aðsetur milli landa er nú sú að þetta er gríðarleg skriffinnska sem tekur dágóðan tíma að koma sér í gegnum. Spurning hvort það taki jafn langan tíma að komast inní íslenska kerfið aftur að loknu námi hér í Noregi.

Fyrst af öllu varð að tilkynna flutning til Noregs á skattstofu í SKI í byrjun september til að fá norska kennitölu. Úrvinnsla þeirrar umsóknar tók 4 vikur og beið mín ný kennitala þegar ég kom aftur til Noregs eftir Íslandsferð í byrjun október. Þá gat ég sótt um bankareikning og ýmislegt fleira.

Fór ég því í DnB bankann hér í Ási og stofnaði bankareikning. Það tók um 20 mínútur í bankanum en síðan liðu 2 dagar, þá kom PIN númer reikningsins í pósti, daginn eftir leiðbeiningar um símabanka og grunnnúmer til að komast í heimabankann. Þriðja daginn kom síðan bankakortið sjálft í pósti og fjórða daginn kom tilkynning um að ég ætti einkennislykil að heimabankanum á pósthúsinu. Stormaði ég því næsta dag á pósthúsið og fékk heimabankann minn. Þurfti að framvísa vegabréfi til að fá sendinguna afhenda. Þá fyrst treysti ég á að senda pening af stað frá Íslandi á nýja reikninginn, það tók 2 daga. Og bæði Kaupþing á Íslandi og DnBNor hér í Noregi tóku ágæta þóknun fyrir að senda peningana af stað og taka við þeim hér.

En það er víst ekki nóg að vera með bankareikning, einnig fékk ég sent bréf frá heilsugæslunni um að ég þyrfti að velja mér heimilislækni. Opnaði ég þá heimasíðu og þar þurfti ég enn eitt lykilorðið til að stofna aðgang þar. Í raun ekki hægt að kalla það eitt LYKILORÐ heldur þurfti ég að sækja um sérstakt skjal hjá skattinum með 20 PIN númerum fyrir mína kennitölu, við innskráningar er ég síðan beðinn tilviljanakennt um 1, 2 eða 3 af þessum PIN númerum.

Þegar þetta skjal barst í hús gat ég opnað mitt svæði hjá lækninum og valið lækni. Á síðan eftir að fá staðfestingu í bréfpósti að sú skráning hafi verið í lagi. En svo maður haldi nú áfram þá er ekki nóg að vera kominn með lækni hér heldur þarf maður að sækja um evrópskt sjúkratryggingarkort þannig að ég sé sjúkratryggður á Íslandi þegar ég fer í jólafrí þangað gegnum Noreg, sambærilegt og ég sótti um slíkt kort á Íslandi áður en ég fór út. Vona bara að ég þurfi ekki að leita til læknis þann tíma sem ég á eftir að dvelja hér úti.

En eins og sjá má af þessu er býsna margt sem þarf að gera til að verða löglegur þegn í nýju samfélagi jafnvel þó maður stundi bara nám í einn vetur, kannski tvo. En pappírsreynsla sem þessi er víst einnig skóli og vistast einhversstaðar inní reynslubankann. Sjálfsagt á einhver pappírsvinna eftir að bætast við ef einhver umsókn hefur gleymst, mér finnst ég nú samt vera búinn að gera nóg.

Annars gengur lífið sinn vanagang ... lítið var um lærdóm um helgina, eldaði íslenska kjötsúpu hann Íslendingunum hér í Ási á laugardaginn. Skrapp til Svíþjóðar í verslunarleiðangur á miðvikudag, alltaf gott að komast þangað, fór í keilu á föstudagskvöldið, þar sem ég átti stórleik í að hitta ekki. Og svo var klukkunni breytt hér um helgina þannig að tímamunurinn á Íslandi og Noregi er ekki nema klukkustund núna.

Þar til næst .... hafið það gott.

Ætli heimurinn sé að hrynja ...

... veit ekki, ætla svosem ekki að velta mér mikið uppúr því í þessari færslu, vil sem minnst hugsa um ísþræla og gengismál. Langt liðið síðan ég bloggaði síðasta og lítið markvert skeð annað en lærdómur. Hef svosem verið í ýmsu pappírsstússi til að verða nokkurn veginn fullgildur þegn í norsku samfélagi, það eitt og sér er efni í sér bloggfærslu seinna.

Skemmtilegasta atvik síðustu viku var í tíma hjá Odd Vangan þegar hann gat ekki hægri klikkað á skjalið sem hann ætlaði að sýna okkur. Var ekki með mús á fartölvunni sinni og veit ekki hvort snertimúsin virkaði ekki nógu vel. Upphófst þá leit að mús en þá kom uppúr dúrnum að aðeins eitt USB tengi var á tölvunni og þar var minnislykillinn. Hann vissi hins vegar af annarri lausri kennslustofu með alvöru tölvu og fór þangað og þá loksins gat kennslan hafist áfallalaust fyrir sig.

Til að halda aðeins í íslenskar hefðir sauð ég hangikjötsbita um helgina og um næstu helgi er stefnan sett á íslenska kjötsúpu til að gleyma aðeins stund og stað, en um helgina væri sérstaklega gaman að vera staðsettur í Dalasýslu. Mikil dagskrá í boði þar í tengslum við haustfagnað sauðfjárbænda og stofnfund félags ungbænda.

Á leiðinni út um daginn greip ég einn kvartaldargamlan Stikluþátt í Leifsstöð. Þar ræðir Ómar Ragnarsson m.a. við eldri konu Ólínu Magnúsdóttur bónda og f.v kennara um þær breytingarnar sem þá voru að verða á íslensku samfélagi. Langar aðeins að vitna í þetta samtal:

„Hver er þín skoðun á uppeldi barna nú á tímum? Það hefur geysilega breyst þó ekki sé farið lengra aftur en 10 ár. Mig undrar bara að börnin skuli vera með heilum sönsum í öllum þessum glundroða. Það eru blöðin, útvarpið, sjónvarpið og þessar þokkalegu barnabókmenntir. Öllu þurfa þau að fylgjast með og þetta alveg ruglar þau. Venur þau frá þessu þjóðlega." Þetta er allt saman rétt, en ég fór að hugsa hvað hefur bæst við á síðustu 25 árum, mjög mikið enda held ég að maður verið hálf ruglaður ef maður ætlar að fylgjast með öllu, að minnsta kosti stelur þetta heilmiklum tíma frá mér daglega. (Internetið, Facebook, MSN, blöðin o.s.frv.)

„Hvað finnst þér um að börn séu mikið ein heima? Get ekki hugsað það til enda, segi það alveg satt. Villingslegt uppeldi. Ég er ekki hrifinn af þessum barnastofnunum þó þær séu betri en börnin séu að flækjast á götunni. Svo er eitt hvað þeir fara skakkt með að taka börnin snemma í skólann, ágætt fyrir kaupstaðabörnin. Þau eru þá minna á götunni en þegar þau eru í skólanum. Meðan þau eiga kost á að vera í sveit, koma þau seint, koma ekki fyrr en sauðburður er búinn eða hálfnaður og þau eru kölluð löngu fyrir göngur og það er nú aðalpúðrið hjá börnunum að vera í réttunum." Í þessu er ótrúlega mikið rétt, velti því fyrir mér hvort ég væri nokkuð í því námi sem ég er í núna nema fyrir þær sakir að ég tók alltaf leyfi þegar eitthvað var um að vera heima og blessunarlega var skólinn að mestu búinn um sauðburð hjá mér öll skólaárin. Öðruvísi hefði ég ekki fengið áhuga á sauðfé og sauðfjárrækt. Kannski er þetta ein af ástæðunum fyrir erfiðri endurnýjun í bændastétt, fólk fær ekki að kynnast henni nægjanlega vel.

Að endingu: „Nú ert þú mikill unnandi íslensks máls. Hvernig sýnist þér ungt fólk tala í dag? Mér finnst nú aldeilis afdæmingur þegar menntamenn, háskólagegnir hámenntaðir menn eru að staglast á því að fyrirbyggja og bæta síðan skottinu við fyrirbyggjandi í staðinn fyrir að segja koma í veg fyrir. Síðan er það annað sem veður uppi núna allavegana í staðinn fyrir að minnsta kosti. Nútíminn staglast á ýmsum orðum. Ofnotar þau, gömul ágæt orð fá aldrei að koma inni á milli." Nú ætla ég ekki að dæma eigin íslenskukunnáttu en það veit ég að þessi orð hennar frá því 1983 eiga enn við í dag og sennilega hefur íslenskri tungu mikið hrakað síðan þá. Hvort ég á eftir að verða hámenntaður háskólagenginn maður sem staglast verður tíminn að leiða í ljós.

Þar til næst, hafið það gott og endilega kvittið. Síðan skulum við hugsa um það allavega að koma í veg fyrir að minnsta kosti stundum að ofnota ekki orðið fyrirbyggjandi.

Til Noregs á nýjan leik

Þá er maður kominn aftur í Ás eftir nokkra góða daga á Íslandi í smalamennskum, fjárragi og sláturvinnu. Mjög svo feginn að ég skildi fara heim til Íslands þar sem faðir minn veiktist og var fluttur á sjúkrahús, veit ekki hvernig ég hefði verið hér úti, vitandi af honum á spítala. Sprakk í honum botnlanginn, sem er ekki það skemmtilegasta sem maður lendir í, þekki það frá jólunum 1995 þegar ég eyddi þeim á sjúkrahúsi af sömu ástæðu, sennilega arfgengt. En hann er kominn heim og óðum að hressast og verður vonandi þokkalega vinnufær í lok mánaðar.  Þannig að það kom í minn hlut að velja líflömbin þetta árið og senda í slátrun, vonandi tókst það bærilega, kemur í ljós næsta vor hvort einhverjir gallagripir hafi læðst með.

Hér hefur kuldinn heldur hert tökin, allavega finnst mér kaldara hér en á Íslandi, þó hér sé rólegrar veðurfar, sól og blíða úti en ekkert sérlega hlýtt. Ekki sama rokið og var á Kjalarnesi á föstudaginn, hef aldrei farið þar um og mætt jafn fáum bílum um miðjan dag á föstudag. Var þá að koma frá Selfossi þar sem ég afhenti restina af sláturlömbunum, var gerðin í þetta skiptið 9,06 og fitan 6,33 og þunginn 15,8 sem þýðir að það er kílói léttara en í fyrra, mun minni fita og aðeins lakari gerð en samt tel ég þetta allt eðlilegt miðað við að slatti af lömb fæddist í júní þetta árið þar sem einn hrútur klikkaði á fyrri hluta fengitíðar.

Og já, ætli verið ekki veisla hjá manni í matinn núna, uppstaðan í ferðatöskunni minni út var kjöt, íslenskt lambakjöt, nánar tiltekið frá Ásgarði. Rétt komst í frystinn, þarf að vera duglegur að borða, svo það verði pláss fyrir meira kjöt eftir jólafrí sem ég vona að byrji fyrr en seinna í desember.

Síðan er ég sérlega ánægður með norska ríkið núna sem veitti mér smá styrk til náms hér sem er gott þar sem gengið á krónunni er ekkert alltof hagstætt, fer heldur uppávið ef eitthvað er þannig að ég fór í bankann í dag til að stofna bankareikning svo ég geti flutt dágóða upphæð út og ekki þurft að hugsa um gengi í hvert skipti sem maður verslar.

Í þessari Íslandsdvöl minni varð ég einnig vitni af bílslysi ca. 10 metrum fyrir framan mig þar sem ég var að gá að fé á túninu, þar sem ökumaður sofnaði undir stýri og endaði á hvolfi ofaní skurði. Blessunarlega slapp hann alveg ómeiddur en ég hef aldrei hlaupið jafnt hratt eftir hjálp og í þessu tilviki þar sem ég var ekki með síma á mér, var langt fram eftir kvöldi að fá eðlilegan hjartslátt aftur, hugsa að mér hafi brugðið meira en konunni sem var undir stýri.

Síðan varð mér ekki að ósk minni um það sem ég setti fram í síðasta pistli, ég þarf að baksa í öllum þessum þremur áföngum það sem eftir er annar þar sem ég stóðst stærðfræðina og hef öðlast próftökurétt.

En þar til næst hafið það gott ... og endilega kommentið !

Alþjóðaumhverfið í Ási

Skilaði mínu fyrsta verkefni í þessum skóla í dag. Var það skylduverkefni í línulegri algebru til að fá próftökurétt. Búinn að ákveða það að ef ég stenst ekki þetta verkefni láti ég þennan áfanga fara lönd og leið, vil frekar einbeita mér að því að gera hina tvo vel enda algebra ekki skylduáfangi hjá, meira undirstaða sem ég hefði átt að vera búinn með áður. (Tilheyrir bara ekki námskránni hjá LbhÍ) 

Annars er það að frétta héðan að hér er orðið skítkalt núna eða þá að ég er að verða veikur, allavega er búinn að vera hálfgerður hrollur í mér í allan dag. Vona frekar að það sé veðurfarið þar sem ég má ekkert vera að því að vera veikur núna, svona rétt fyrir Íslandsför til að komast í fjárrag og smalamennskur.

En annars er umhverfið hér í Ási mjög alþjóðlegt þegar maður fer meira að velta því fyrir sér, allavega þegar ég er að rölta í skólann mætir maður fólki af mjög ólíkum uppruna á gangstéttunum og þegar maður leggur við hlustir þá eru ekkert allir að tala norsku eða ensku, hér heyrir maður óminn að fjöldanum öllum af tungumálum, sumum sem maður skilur ekki baun í. Svo þegar ég var á leiðinni heim áðan þá mætti ég einum Japana sem ætlaði að spyrja til vegar og ég sagðist nú bara vera Íslendingur, nóg fyrir mig að rata þá leið sem ég þarf að fara daglega, get kannski sagt til vegar í vor ef ég verð duglegur að læra.

Síðan finnst mér eitt ansi hreint merkilegt í þessum 10.000 manna bæ að hér er aðeins eitt kaffihús/pöbb „Texas" (gætu verið fleiri, hef bara ekki séð þau) og þar mæta nánast allir. Skruppum við Íslendingarnir þangað fyrr í kvöld og í einu horninu þar sátu allir helstu stærðfræðikennarar skólans og ræddu heimsins gang og nauðsynjar. Fannst það skondið þar sem ég var að skila verkefni til þeirra í dag. Þarna var semsagt kennarinn minn og sá sem kom sem forfallakennari í dæmatíma um daginn og vissi ekki neitt að því er mér fannst. Ragnar sagði mér hins vegar í kvöld að sá væri helsti stærðfræðikennari skólans. Vona að ég álpist ekki í tíma til hans.

Frá því síðast hef ég samt sennilega mest ásamt algebrunni stúderað vigtarseðilinn af lömbunum sem fóru í slátrun um daginn, 202 stk., 15,98 kg fallþungi, gerðin 9,13 og fitan 6,09. Hefði viljað sjá meiri þunga og hærri gerð en er mjög ánægður með fitustuðulinn. En það þarf jú að stúdera hann þar sem ég hafði hugsað mér að vinna með gögn frá þessu hausti þegar ég fer að reikna BLUP einkunnir í HFA301 enda hristir Tormod bara hausinn þegar ég opna fjarvis.is í tíma og get nánast náð mér í þau gögn sem ég vil til að vinna með, sem sýnir bara að gott skýrsluhald er góður kostur. Hjálpar allavega við að skilja jöfnurnar sem eru nánast óskiljanlegar í bókinni.

En til að kóróna allt saman þá úthlutaði Odd mér seminar verkefni um val fyrir frjósemiþáttum hjá músum, flestir fá að fjalla um almenn húsdýr en ég um mýs. Æðislegt. Ætla ekki að hugsa um það fyrr en ég kem frá Íslandi aftur, þarf ekki að skila því fyrr en í lok nóvember.

Þar til næst, hafið það gott.