Ski storsenter ...

... er undarlegt fyrirbæri sem og flestar aðrar verslunarmiðstöðvar, hætti mér þangað áðan en var fljótur út aftur. Skil bara ekki hvernig hægt er að hafa svona mikið af fólki á einum og sama staðnum á sama tíma. Í ofanálag eru svona Storsenter með 10 km millibili hér í Noregi, allavega hér í nágrenni við mig.

Skrapp til að versla ísbor fyrir Ragnar sem hann sá á einhverju tilboði en á ekki heimangengt þar sem hann er einhvers staðar á skíðum hér norður í landi. Mig grunar samt að ekki sé mikið skíðafæri í Noregi í dag, allavega er veðráttan þess eðlis núna, þónokkur skafrenningur, blint og leiðinlegt að keyra. En ég ætla ekki að kvarta, fínt að hafa nóg af snjó, hugsa að ég hafi ekki haft svona mikinn í snjó í kringum mig síðan 1995.

Annars gengur lífið sinn vanagang, hægt og rólega, ég sótti sauðfjárræktarráðstefnu um síðustu helgi sem var mjög góð. Skildi það mesta sem þar fór fram en ég var nú ekkert mikið að spjalla við menn þarna, þó kom einn norðan úr Þrændalögum og spjallaði heillengi við mig, m.a. um Geir H. Haarde sem hann sagði ættaðan úr nágrenni við sig. Hins vegar gladdi það mig meira að heyra hann hrósa íslensku sauðkindinni í hástert, á bæði kindur af norska kyninu og örfáar spælkyninu sem náskylt því íslenska, sagði að Norðmenn ættu bara eftir að átta sig á því að íslenska kindin væri mun betri en sú norska.

Þar sem ég er nú í landbúnaðarnámi og ekki enn séð mikið af norskum bústofni ákvað ég í gær eftir tíma að labba í átt að útihúsunum og reyna að finna fjárhúsin eða kindafjósið eins og sagt er á norskri tungu. Fann ég það og kom mér eiginlega á óvart hversu stórt það var, hitti þar fjárhirðinn Símon sem er frá Bretlandi. Það var gaman að hitta hann og nú þarf maður bara að verða sér út um meiri upplýsingar um þennan sauðfjárbúskap, ætla að hafa samband við yfirfjárhirðinn við fyrsta tækifæri.

Held samt að ummæli vikunnar hafi tölfræðikennarinn minn átt þegar hann var að útskýra PRESS hugtakið sem er notað við tölfræðipróf í fervikagreining. Einn nemandi skildi ekki af hverju sú tala gat verið svona breytileg en svar hans var á þessa leið: „Ef þú mælir fílana þína í míkrógrömmum verður talan há, lág ef þú mælir í tonnum" sem er bara fjandi góð samlíking og alveg laukrétt.

En þar til næst, hafið það gott ... set hér inn mynd af gemlingum í kindafjósinu og eldri ánum, fer seinna og tek fleiri og betri myndir.

 

Athugasemdir

[Unnsteinn Snorri (IP-tala skráð) 20.2.2010 kl. 23:15]

Sæll, Eyjólfur

 Gaman að sjá í fjárhúsin.  Fór þarna um fyrir nokkrum hárum síðan.  Mann reyndar ekkert eftir þessum húsum.  En er ekki rét hjá mér að þarfna er gjafagrind af íslenskri fyrirmynd (selfoder hekk) held ég að norsinn kalli þetta.  Síðan virðist vera þétt legusvæði upp við grindina.  Kjarnfóður gefið í rennur með útveggjum og etv. steinefni í bláu dallana.  Rannsakaðu þetta frekar og gefður skýrslu.  Ertu búinn að hafa spurnir af Loðdýrinu sem er þarna rétt norðvestan við þig.  Nú er búinn fyrsta Vizkukýrin án Jolla.  Af virðingu við fyrrum spurningahöfund mætti ég ekki (var reyndar að láta fósturtelja í féinu hjá mér á sama tíma).  En heyrði að þetta hefði farið vel fram og með réttu hafi verið hraunað yfir nýjasta kennarann hér á Hvanneyri.

[Anna Lóa (IP-tala skráð) 22.2.2010 kl. 11:11]

Sæll,

Gaman að sjá myndir úr kindafjósinu.. ég fór þangað sjálf þegar ég var í Noregi og þótt ávallt jafn gott þegar maður var orðinn græn í framan af bókalestri. Ég vona að þú hafir tekið eftir þættinum á ruv í gær um forystufé... endilega kíktu á hann ef ekki og komdu með þitt komment um þáttinn.. Það væri gaman að heyra hvað þér finnst :)

Kveðja